Фото: www.baikal-daily.ru
«Этигэлтэ Хамба ламы найр» мүнөө жэл 23-дахияа болохоор хараалагдана. Жэл бүри ондо ондоо үдэр эмхидхэгдэдэг гээшэ, шэнэ һарын 4-дэхи үдэр болодог юм. 2026 ондо энэ үдэр сентябриин 15-да тушаалдана.
12 дугаар Бандида Хамба лама Даши-Доржо Этигиловэй мүнхэ бэе 2000 онуудай эхиндэ ологдоо һэн. Мүнөө үедэ Ивалгын дасанай дэргэдэхи өөрын ордондо һуудаг болонхой.
Орос гүрэн дотор буддын шажан үндэр Елизавета хаанай зарлигаар 285 жэл саана 1741 ондо зүбшөөгдэн нэбтэрүүлэгдэжэ эхилээ һэн. Тиигэжэ Екатерина хаанай зарлигаар Бандида Хамба ламанарай тушаал 1764 ондо байгуулагдаа. Харин Даши-Доржо Этигилов түрэһөөр 174 наһа гүйсэхэнь. Буряад Уласай Засагай газарай, Буддын шажанай заншалта сангхын дэмжэлгээр тус найр наадан эмхидхэгдэжэ, дээрэ тоологдоһон ойнуудта зорюулагдана.
Хэмжээ ябуулга ехэ уншалгаһаа эхилхэ. Бүхы Орос гүрэнэй дасануудай шэрээтэ ламанар эндэ хабаадажа, Этигилов Хамба ламада мандал үргэдэг юм.
Ивалгын дасанай дэргэдэхи стадион дээрэ “Эрын гурбан нааданай” мүрысөөнүүд болохо. Урдань соёлой хүдэлмэрилэгшэд Этигэл Хамба ламада мүргэл хэжэ, һайхан тоглолто сугларагшадта дурадхана. “Эхэ хэлэн-манай баялиг” гэһэн урилдаанда хабаадаһан уласай ондо ондоо һуралсалай гуламтануудай 108 һурагшад нэгэ доро тайзан дээрэ гаража, “Этигэл Хамбын зальбарал”, “Сагаан Дара Эхын магтаал” хангюурдаха. Иимэ юумэн анха түрүүшынхиеэ болохонь гээд хэлэлтэй.
Буряадаймнай урагшаа хараха дуушад Дамба Занданов, Бадма-Ханда Аюшеева, Саян ба Эржена Жамбаловтан, Дари Бадмаева, “Лотос” гэһэн зүн зүгэй хатарай арадай ансамбль, “Булжамуур” гэһэн арадай хатарай жэшээтэ ансамбль болон бусад түрүү зүжэгшэд арад зониие баярлуулха.
“Эгээл амтатай сай”, “Эгээл амтатай боово”, “Эгээл амтатай зөөхэй” гэһэн урилдаанууд сугларагшадые һонирхуулан анха түрүүшынхиеэ энэ үдэр эмхидхэгдэхэнь. Эрхимлэһэн хүнүүд 15, 10, 5 мянган түхэригөөр шагнагдаха. Эндэ хабаадаха гэбэл иимэ электрон хаягаар мэдүүлгэ оруулха хэрэгтэй: crkit-ivl@govrb.ru. Али гэбэл Иволгинск тосхон ерэжэ, Ленинэй үйлсэдэ оршодог аяншалгын болон соёлой түбтэ орожо, мэдүүлгэеэ сентябриин 8 болотор үлөөхэ хэрэгтэй.
Уран дархашуулай бүтээлнүүдэй, гарай бэлэгүүдэй үзэсхэлэн эмхидхэгдэхэ. Дуратай юумэеэ хүн бүхэн абаха эрхэтэй байха. Мүн заншалта хубсаһанай флешмоб үнгэргэгдэхэ.
«Этигэлтэ Хамба ламын найрай» 23 жэл саана эмхидхэгдэжэ эхилхэһээ абаад буряад үндэһэн тамирай зүйлнүүдээр мүрысөөнүүд болодог заншалтай. Энэшье удаа барилдаашад, харбаашад мүрысэхэ, мори урилдаагаар мүрысөөн болохо юм. 12 жэл саана 2014 ондо түрэһэн морин жэлтэй хүбүүд хибэс дээрэ гаража, арга шадалаа туршаха. Хажуугаарнь һээр шаалганай, шагай нааданай мүрысөөнүүд болохоор хараалагдана.
Үдэрэй хугасаада Ивалгын дасанай талмайнуудтай танилсуулгын экскурсинүүд эмхидхэгдэхэ. Бүхы юумэ мэдэхэ гиднүүд энэ үдэр хүдэлхэ.
Ивалгын дасанда болохо найрта ошохо гэбэл, Улаан-Үдэһөө Ивалгын дасан хүрэтэр автобусууд табигдаха. Үглөөнэй 7 часһаа үдэшын 20 час болотор 15 минута болоод лэ ябажа байха. Ивалгын дасанһаа үдэшын 21 час болотор автобус ябахаар хүлеэгдэнэ.
Источник: ИА Байкал-Daily
03.09.2026 15:43
