Улаан-Үдэ хотодо үнгэржэ байһан Буддын шажанай Ехэ хуралдаанай айлшад августын 14-дэ Эсэгэ ороноо хамгаалгын дайнай баатарлиг сэрэгшэдэй мүнхэ дурасхаалые хүндэлжэ, Илалтын Хүшөөдэ баглаа сэсэгүүдые бариба.
Баяр ёһололдо Буряад Уласай Арадай Хуралай Түрүүлэгшын саг зуура уялга дүүргэгшэ Баир Гармаев уласай хуули баталалгын зургааниие түлөөлбэ.
Дурасхаалай митинг нээхэдээ, Буряад Уласай Толгойлогшо Алексей Цыденов Эсэгэ ороноо хамгаалгын дайнда совет арадай Агуу Илалта шэн габьяагай түүхэ тухай мэдээсэбэ, мүн Монгол ороной дэбисхэр дээрэ япон дай үүсхэгшэдые тогтооһон 1939 оной Халхин Гол дээрэхи байлдаанай хубилалта үйлэнүүүдые дурсан тэмдэглээ. Гэхэ зуура, аяар 1944 ондо гитлерэй Германиие Совет гүрэн лаб илахань гэжэ эли тодо болоһон лэ хойно Америкэ, Великобритани гүрэнүүд хоёрдохи дайнай үйлэ нээһэн тухай онсолон тэмдэглээ. Тиигэжэ Америкэ энэ дайнай һайгаар «америкын агууехэ депрессиһээ» - 30-аад онуудай эдэй засагай болон мүнгэн һангай шахардуу байдалһаа мултарһан юм. Мүнөөшье өөрынгөө эдэй засагай бэрхэшээлнүүдые шиидхэхэ эорилготой дэлхэй дээрэ сэрэгэй зүрилдөөнүүдые хурсадхалгын бодолго дахин эрхилнэ, гэжэ Буряадай толгойлогшо тайлбарилба.
Митингда хабаадагшад Эсэгэ Ороноо хамгаалгын дайнай баатарлиг сэрэгшэдэй мүнхэ дурасхаал дуугай байдалаар хүндэлжэ, Агуу Илалтын хүшөөгэй дэргэдэхи Мүнхын зулада баглаа сэсэгүүдые табиба.
