Фото: В.А. Матвиевский
Олон ондоо яhатан гэбэл, Буряад ороной дэбисхэр дээрэ 167 яhанай илгаатай арадуудай түлөөлэгшэд ажаhуудаг юм байна. Арад бүхэн өөhэдынгөө хэлэ, заншал, гуримуудаа баримталдаг, тэдээнээ бусад яhатанай нүлөөн доро гээжэрхингүй үлээхэ, хүгжөөхэ гол зорилготой гэжэ мэдээжэ ха юм даа.
Яhатан бүриин түбүүд байгуулагданхай, тэдэнэй 11-нэгэниинь энэ үдэшэ театрай тайзан дээрэ гарабад. Найрамдалай зангилаа гүрэhэн хатарай бүлгэмүүдые нэрлэбэл: «Бадма сэсэг», «Булжамуур», «Намарай тэрэнги», «Квартал-хатар», «Тэрэнги», «Байгал-Идель» (татаар), армян үндэhэн соёлой түб, Хитадай Арадай Республикаhаа соёл, урлалай академида hурадаг оюутад. Аюна Дамбаева монгол хатар эрхимээр гүйсэдхөө.
Ехэ нааданай шэмэг болоhон дууша бүлгэмүүдые нэрлэбэл: Забайкалиин шэмээшэгүүдэй арадай хоор, Солонгос дуушад, Тыва Республикаhаа Хүдөө ажахын академидэ hурадаг оюутадай «Салгал» шуулга, украин түбэй «Барвинок» шуулга, хасагуудай дуунай шуулга «Сэлэнгын hуурин», Буряад Республикын хасагуудай тойрогой соёлой түбэй «Даури», П. И. Чайковскийн нэрэмжэтэ урлалай hургуулиин арадай аман зохёолой «Жэргэмэл» шуулганууд. «Жэргэмэл» шуулга поляк арадай дуу дуулаба, үнгэрhэн жэлдэ Польшо ошожо, амжалтатай ябажа бусаhан юм. 2012 оной «Алтаргана» нааданда арадай дуу дуулажа илажа тодорhон Арюна Лодоева баhал арадай дуу дуулажа, харагшадаа баясуулаа. Нааданай шэмэг боложо хабаадаhан айлшадаа нэрлэбэл: чуваш арадай «Йамра», Эрхүү можын Шэнэ-Зуhалангай нютагай байгууламжын соёлой болон амаралгын түбэй шуулганууд hонирхолтой байбад.
Эндэ хабаадаhан түбүүд театрай танхимай урда талмай дээрэ hонирхолтой, арадайнгаа ажабайдалда хабаатай үзэсхэлэнгүүдые дэлгээ
Арадуудай үндэhэн соёлой дүхэриг ехэ Гала-концертээр дүүрэжэ, эдэбхитэдтэ бэлэг сэлэгүүд, баярай бэшэгүүд барюулагдаа. Иимэл согтой, залитай, эбдэршэгүй мүнхэ дүхэригэй хэтэдээ байгаа болобол, арадуудай хани барисаан хэтэдээ бэхи, найдалай гэрэлээр сасаржа байха гээд, гол тобшолол хэмээр байна.